ನಾವೀಗ ಸರ್ಕಾರ ಮಾಡಲಿ, ಕಾರ್ಪೋರೇಟ್ ಸಂಸ್ಥೆಗಳು ಮಾಡಲಿ ಎಂದು ಕಾಯುತ್ತ ಕೂರುವುದಕ್ಕಿಂತ ನಾನೇನು ಮಾಡಲಿ ಎಂದು ಯೊಚಿಸಲಾರಂಭಿಸಬೇಕಿದೆ. ಇಚ್ಛಾಶಕ್ತಿಯ ಮೂಲಕ ಪರಿಸರದಲ್ಲಿ ಬದಲಾವಣೆಗಳನ್ನು ತರಲು ಯತ್ನಿಸಿದ ಹಲವರು ನಮ್ಮ ಮುಂದೆ ನಿಲ್ಲುತ್ತಾರೆ. ಟ್ರಾಫಿಕ್ ಜಾಮ್, ರಸ್ತೆಯ ತಗ್ಗು ಗುಂಡಿಗಳಿಗಾಗಿಯೇ ಸದಾ ಸುದ್ದಿಯಲ್ಲಿರುವ ರಾಜ್ಯದ ರಾಜಧಾನಿ ಬೆಂಗಳೂರು ಕಳೆದ ತಿಂಗಳು ಗುಲಾಬಿ ಬಣ್ಣದ ಮೇಲುಹೊದಿಕೆಯನ್ನು ಹೊದ್ದು ಸುಂದರವಾಗಿ ಸಿಂಗರಿಸಿಕೊಂಡಿದ್ದ ನೋಡಿ ಎಲ್ಲರೂ ಸoಭ್ರಮಿಸಿದೆವಷ್ಟೇ! ಈ ‘ಪಿಂಕ್’ ಸೌಂದರ್ಯದ ಹಿಂದಿನ ರುವಾರಿ ರಾಜ್ಯದ ವಿವಿಧೆಡೆ ಉಪ ಅರಣ್ಯ ಸಂರಕ್ಷಣಾಧಿಕಾರಿಯಾಗಿ ಸೇವೆ ಸಲ್ಲಿಸಿ ಬೆಂಗಳೂರನ್ನು 'ಗಾರ್ಡನ್ ಸಿಟಿ' ಯಾಗಿಯೇ ಉಳಿಸುವತ್ತ ಶ್ರಮಿಸಿದ ದಿ.ಎಸ್.ಜಿ. ನೇಗಿನಹಾಳರು ರಾಜ್ಯ ಕಂಡ ಅಪರೂಪದ ಅಧಿಕಾರಿ. ಗಿಡ ನಡೆವ ಚಟುವಟಿಕೆ ಅದರಲ್ಲೂ ಬೆಂಗಳೂರಲ್ಲಿ ಹೊಸದಲ್ಲವಾದರೂ, ಸುಮಾರು 1.5 ಮಿಲಿಯನ್ ಗಿಡಗಳನ್ನು ನೆಡೆಸುವ ಮುನ್ನ ನೇಗಿನಹಾಳರು ಪ್ರತಿಮನೆಯ ಮನೆಯ ಬಾಗಿಲ ತಟ್ಟಿ ಆ ಮನೆಯವರಿಗೆ ಯಾವ ಗಿಡ ಬೇಕೋ ಆ ಗಿಡವನ್ನೇ ಅವರ ಮನೆಯ ಮುಂದೆ ನಡೆಸಿದ ಸೂಕ್ಷ್ಮತೆಯವರು. ಸಸಿಯ ರಕ್ಷಣೆಯ ಜವಾಬ್ದಾರಿಯನ್ನು ಮನೆಯವರಿಗೇ ಕೊಟ್ಟು ವೈಯುಕ್ತಿಕ ಪರಿಸರ ಜವಾಬ್ಧಾರಿಯನ್ನು ಜನರಲ್ಲಿ ಮೂಡಿಸಿದವರು. ಅವರು ನಡೆಸಿದ 150 ಗಿಡಗಳ ಪ್ರಬೇಧಗಳಲ್ಲಿ ರೇನ್ ಟ್ರೀ, ಆಕಾಶ ಮಲ್ಲಿಗೆ, ಬೊಗನ್ ವಿಲ್ಲಾ, ಟಬೆಬುಯಾ ರೋಸಿಯಾ ಆಡು ಭಾಷೆಯಲ್ಲಿ ಗುಲಾಬಿ ಮರಗಳೇ ಹೆಚ್ಚಾಗಿದ್ದ ಕಾರಣ ನಗರ ಪ್ರತಿ ಜನವರಿ-ಫೆಬ್ರುವರಿಯಲ್ಲಿ ಗುಲಾಬಿ, ಹಳದಿ, ನೀಲಿ ಬಣ್ಣಗಳಿಂದ ಸಿಂಗಾರ ಗೊಂಡು ಎಲ್ಲರ ಗಮನ ಸೆಳೆಯುತ್ತದೆ. ಈ ಬಾರಿ ಅದು ಎಲ್ಲರ ಗಮನ ಹೆಚ್ಚಿನ ಪ್ರಮಾಣದಲ್ಲಿ ಸೆಳೆದಿದ್ದು, ನಗರದ ಉಸಿರು ಉಳಿಸಲು ಶ್ರಮಿಸಿದ ಅಧಿಕಾರಿಯ ಆತ್ಮಕ್ಕೆ ಕೊಂಚ ಮಟ್ಟಿಗೆ ತೃಪ್ತಿಯಾಗಿರಬೇಕು. ಅಧಿಕಾರ ದೊರೆತರೂ ಹೀಗೆ ಬಂದು ಹಾಗೆ ಹೋಗುವ ಅನೇಕರ ನಡುವೆ ನೇಗಿನಹಾಳ್, 'ಗಿಡಗಳೇ ಮೊದಲು' ಎನ್ನುವ 'ಡಾ.ಎಲ್ಲಪ್ಪರೆಡ್ಡಿಯಂತಹ ಅಧಿಕಾರಿಗಳು ಅಪರೂಪವೆನ್ನಿಸುತ್ತಾರೆ.
